ແຜ່ນດິນໄຫວ ທີ່ແຮງ 6.8 ຣິກເຕີ ສັ່ນສະເທືອນ ມຽນມາ ເຮັດໃຫ້ 3 ຄົນເສຍຊີວິດ

ແຜ່ນດິນໄຫວຂະໜາດແຮງ ໄດ້ສັ່ນສະເທືອນ ພາກເໜືອຫາພາກກາງ ຂອງມຽນມາ ໃນວັນພຸດວານນີ້ ເຊິ່ງໄດ້ສັງຫານຢ່າງນ້ອຍ 3 ຄົນ ແລະ ເຮັດໃຫ້ ວັດວາ​ອາ​ຮາມ ທີ່ເກົ່າແກ່ ປະມານ 60 ວັດ ໄດ້ຮັບຄວາມເສຍຫາຍ.

ສອງຄົນທີ່ເສຍຊີວິດນັ້ນ ແມ່ນ​ແມ່ຍິງ ອາຍຸ 7 ປີ ແລະ 15 ປີ.

ແຜ່ນດິນໄຫວ ມີຄວາມແຮງຂະໜາດ 6.8 ອີງຕາມ ອົງການສຳຫຼວດທໍລະນີສາດ ສະຫະລັດ ທີ່ຮູ້ສຶກກັນ ​ໄປ​ເຖິງບາງກອກ ປະ​ເທດໄທ ແລະ ເມືອງ Kolkata ໃນ ອິນເດຍ ເຊິ່ງແຕ່ລະແຫ່ງນັ້ນ ແມ່ນໄກອອກໄປປະມານ 1,000 ກິໂລແມັດ.

ຈຸດສູນກາງຂອງແຜ່ນດິນໄຫວ ແມ່ນຢູ່ໃກ້ກັບເມືອງ Chauk ​ໃນແມ່ນ້ຳ Irrawaddy ຢູ່ທີ່ຄວາມເລີກ ປະມານ 84 ກິໂລແມັດ. ແຜ່ນດິນໄຫວທີ່ເກີດຂຶ້ນຢູ່ເລິກໆນັ້ນ ທຳມະດາ ແລ້ວ ກໍ່ໃຫ້ເກີດຄວາມເສຍຫາຍຢູ່ເທິງພື້ນດິນ ໜ້ອຍກວ່າ.