3 ຈຸດໂທດ! ອາກຊັງຕິນ ສະເໝີ ຮົງດູຣັສ 1-1 ຕົກຮອບໂອລິມປິກ
ການແຂ່ງຂັນເຕະບານຊາຍ ໃນກີລາໂອລິມປິກ 2016 ສຳລັບຮຸ່ນອາຍຸບໍ່ເກີນ 23 ປີ ທີ່ສະໜາມກີລາແຫ່ງຊາດ ໃນເມືອງບຣາຊິເລຍ ເມືອງຫຼວງຂອງບຣາຊິນ ເປັນການພົບກັນໃນນັດສຸດທ້າຍຂອງກຸ່ມ D ລະຫວ່າງ ອາກຊັງຕິນ ກັບ ຮົງດູຣັສ ໂດຍທີມອາກຊັງຕິນ ຈະຕ້ອງຊະນະສຖານດຽວຫາກຫວັງເຂົ້າຮອບ.
ເກມເລີ່ມຂຶ້ນ ຮົງດູຣັສ ໄດ້ຈຸດໂທດໃນໄລຍະທົດເຈັບ ນາທີທີ່ 45+6 ຈາກຈັງຫວະທີ່ ອັນແບໂຕ້ ເອລິສ ຖືກ ເກໂຣນິໂມ ຣູຢີ ອອກມາເຕະຂາຈົນລົ້ມລົງໄປ ແຕ່ ໄບຣອັນ ອະຄອສຕາ ຍິງໄປຕິດການປ້ອງກັນຂອງ ຣູຢີ ຈົບເຄິ່ງທຳອິດຍັງສະເໝີກັນແບບບໍ່ມີປະຕູທີ່ 0-0.
ຕໍ່ມາໃນເຄິ່ງຫຼັງ ນາທີທີ່ 55 ອາກຊັງຕິນ ໄດ້ຈຸດໂທດຄືກັນ ຈາກຈັງຫວະທີ່ ໂຈນາທານ ຄັນເລຣີ ຖືກ ມາເຊໂລ ເປເຣຣາ ດຶງຕົວຈົນລົ້ມລົງໄປ ແຕ່ ອັງເຄວ ຄໍເຣອາ ກໍຍິງຈຸດໂທດພາດໄປເຊັ່ນກັນ ຍິງຫຼຸດຂອບປະຕູອອກຫຼັງໄປຢ່າງໜ້າເສຍດາຍ.
ແຕ່ແລ້ວ ນາທີທີ່ 75 ຮົງດູຣັສທີ່ ໄດ້ຈຸດໂທດອີກຄັ້ງ ຈາກຈັງຫວະທີ່ ອັນແບໂຕ ເອລິສ ຄົນເກົ່າ ຖືກ ເລົາຕາໂຣ ຈິອາເນັດຕິ ສະໄລກ່ຽວຂາຈົນລົ້ມລົງໄປ ໂດຍຄັ້ງນີ້ເປັນ ແອນໂທນີ ໂລຊາໂນ ຮັບໜ້າທີ່ສັງຫານເຂົ້າໄປບໍ່ພາດ ຮົງດູຣັສ ນຳກ່ອນ 1-0.
ໄລຍະທົດແທນເວລາບາດເຈັບນາທີ ທີ່ 90+3 ອາກຊັງຕິນ ຕີສະເໝີໄດ້ສຳເລັດ ຈາກຈັງຫວະ ມາເຣຍໂນ ມາຕິເນຊ ຍິງລູກໂທດນອກເຂດໄປຕຳກອງຫຼັງຮົງດູຣັສ ເຂົ້າໄປ ຈົບເກມດ້ວຍຜົນ 1-1 ແຕ່ປະຕູຕີສະເໝີກໍບໍ່ພຽງພໍ ຫຼັງກຸ່ມ D ມີ ປອກຕຸຍການ ທີ່ໄດ້ 7 ແຕ້ມ ກັບຮົງດູຣັສ ທີ່ມີ 4 ແຕ້ມ ທັງ 2 ເຂົ້າຮອບ 8 ທີມສຸດທ້າຍໄປ.
ຜົນຄູ່ອື່ນ ອານເຊຣີ 1-1 ປອກຕຸຍການ.
